امبارح طبعا كان مؤتمر أبل للمطورين WWDC 2020 ونزلت فيه iOS 14 وiPadOS 14 وmacOS Big Sur 11 وكمان watchOS 7.. بس البوست ده مخصوص لكمية الانبهارات اللي شوفتها في سيستم الآيفون الجديد.. انبهارات فعلا!
طيب مبدئيا كدا معاك 👇
🍎 ميزة App Library
ودي ياسيدي ببساطة بس عشان تبقى فاهم هي انك تقدر ترتب وتجمع الأبلكيشنز في صفحة الهووم مع بعض في فولدر واحد حسب نوع الابلكيشنز زي Social وHealth وFitness وكمان متجمعلك في فولدر واحد أكتر الأبلكيشنز اللي بيتم استخدامها كتير مؤخرا، لأ وكمان ماشاء الله بقى ممكن المستخدمين يمسحوا أبلكيشنز من الهووم بتاعتهم..
بالمناسبة الـApp Library وفولدراتها ليها صفحة مخصوص من صفحات الهووم، يعني مش في أي حتة كدا تعبجك تعمل فولدر بالأبلكيشنز اللي انت عايزها.. هي سايبة!
🍎 ميزة حرية اختيار وتحريك Widgets
زمان الويدجيتس كانت موجودة في الآيفون عادي بس ليها مكان معين ومحدد في صفحة Today بشكل رأسي، بس دلوقتي مع iOS 14 الموضوع بقى حر اكتر تحرك الويدجيتس في أي مكان من الهووم وكمان بتصميمات مختلفة وتقدر تحطها في وسط الأبلكيشنز عادي
كمان فيه نوع من الويدجيتس لطيف اسمه Smart Stack وهو عبارة عن ويدجيت بتقدر جواها تقلب بين مختلف الويدجيتس اللي انت بتستخدمها بشكل كبير، وكمان ممكن تظبطها انها تغير بين الويدجيتس اللي انت بتحتاجها على حسب الوقت خلال اليوم!
🍎 مزايا Siri
زمان لما كنت بتستدعي سيري بصوتك هووب بتستحوذ على الشاشة كلها، دلوقتي يادوب سيري هتصحى في شكل أيقونة دائرية كدا في نص أسفل الشاشة عشان تقدر النتايج تظهرلك فوق في الشاشة المفتوحة قدامك
كمان سيري هتقدر دلوقتي انها تترجم في الوقت الفعلي RealTime بين اللغات المختلفة ومن بينها العربي وبتعتمد الترجمة هنا على محرك أبل العصبي Neural Engine وكمان مبتحتاجش أي انترنت، وأبل قالت ان مفيش أي داتا بتخرج من تليفونك!
🍎 ميزة Picture-in-Picture
طبعا دي ميزة هايلة انك تقدر تفتح شاشة أبلكيشن وتستخدمه بشكل مصغر وانت في نفس الوقت بتستخدم أبلكيشن تاني زي يوتيوب مثلا وواتساب وغيرهم، وطبعا تقدر تحرك الشاشة المصغرة بتاعت الأبلكيشن التاني براحتك طول الوقت لأي مكان في الشاشة.. ودي موجودة في أندرويد 8.0
🍎 ميزة App Clips
دي ياسيدي ميزة كدا انبهارية منبهرة هتبهرك وهي بتخليك تقدر تشغل جزء معين من أبلكيشن وتستفيد منه بدون ما تحتاج أصلا انه تداونلود الأبلكيشن نفسه.. ودي بالمناسبة موجودة في أندرويد من كام سنة واسمها Instant Apps
بس خلينا برضو منطقيين ابل عاملة أحسن وعملي أكتبر من اندرويد، لإنك تقدر تخلي عندك حتة الأبلكيشن اللي انت نزلتها دي من الأبلكيشن الرئيسي وبتكون موجودة على موبايلك، وده طبعا بيوفر مساحة كتير ليك..
لطيف برضو جدا انه ممكن تشغل الـ App Clip لأي أبلكيشن من خلال الويب أو الخرايط Maps بتاعت أبل أو الرسايل Messages أو كمان تاجات NFC وأكود QR !
🍎 مزايا Messages الجديدة
دلوقتي تقدر تثبت Pin لـ 9 محادثات في أول ليستة الرسايل
دلوقتي هتقدر في جروبات الشات الجماعي تشوف صورة كل الناس اللي في الجروب
ممكن تعمل reply على مسدج معينة فالناس تبقى فاهمة انت بترد على ايه تحديدا
كمان ممكن تعمل مينشن @ جوا جروبات الشات وده هيسهل انت موجه الكلام لمين
🍎 مزايا Memoji الجديدة
تحديثات كتير جديدة لتغيير شكل الشخصيات ومنها انك تلبس شخصيتك كمامة
🍎 مزايا الخرايط Maps
كتير تحديثات برضو جاية لتطبيق خرايط أبل بس أهمها انها هتنبهك لأماكن الرادار والإشارات الحمرا، بس ده طبعا مش في مصر يعني 
🍎 أبلكيشن ترجمة جديد Translate
ده بقى جديد خالص بس اعتبره نسخة من Google Translate ولطيف برضو بيشتغل بدون نت
🍎 تحديثات براوزر سفاري
براوزر سفاري بيقدر مع التحديث الجديد يتابع إن كانت باسورداتك اتسربت في أي عمليات تسريب داتا سرية لأي موقع، زي ما بيعمل كروم عادي على الويب مش أندرويد، وكمان تقدر تترجم صفحات ويب كاملة من جوا البراوزر من غير ما تحتاج موقع أو أبلكيشن إضافي، بس مش متاح للأسف للعربي!
🍎 ميزة Car Keys
أيون دلوقتي iOS 14 هيخليك تحول موبايلك الآيفون إلى مفتاح عربيتك عن طريقة ميزة NFC وبسهولة تقدر برضو تمسح مفتاح عربيتك من موبايلك لو اتسرق موبايلك، أول شركتين دخلوا الميزة دي فعلا هم فورد و BMW
🍎 تحديثات سماعات AirPods Pro
دلوقتي بالتحديث الجديد، سماعات أبل آيربودز برو وايرلس هتقدر تخليك تستمتع بميزة الصوت المحيطي Virtualized Spatial Audio لو الصوت اللي بتسمعه متشفر بتقنية Dolby Atmos أو 7.1 أو 5.1، كمان أبل بتستخدم ميزة تتبع حركة راسك بالنسبة لمكان الجهاز اللي جايلك منه الصوت، بحيث يبقى الصوت واصلك بشكل واقعي جدا كإنه بجد حواليك!
🍎 ميزة شكل المكالمات الجديد
دلوقتي لما تبقى فاتح أبلكيشن، وتجيلك مكالمة من أبلكيشن أو FaceTime أو حتى مكالمة تليفون عادية خلاص مش هتقفلك الشاشة بالكامل، إنما يادوب هتبقى في صورة مستطيل صغير في الشاشة من فوق، وبسهولة تقدر تـSwipe عشان تشيل القصة دي خالص وتكمل عادي اللي بتعمله.. عتيقة ف الأندرويد اكيد!
🍎 ميزة السيرش العالمي
زي بظبط ما فيه على الماك سيرش Spotlight، أبل عملت في iOS 14 محرك بحث يقدر المستخدم يسيرش بيها في الأبلكيشنز والويب في نفس الوقت من مكان واحد.. وبرضو ده عتيق ع الأندرويد.
👀 نيجي للكلام المهم 👀
امتى iOS 14 هينزل لكل؟ 🤔
لأ مفيش موعد رسمي، بس أكيد مع الىيفون الجديد على سبتمبر
لأ مفيش موعد رسمي، بس أكيد مع الىيفون الجديد على سبتمبر
موبايلك هيدعم iOS 14 ولا لأ؟ 🤔
الموبايلات من أول آيفون 6s و6s Plus لحد الىيفون الجديد هيدعموا iOS 14
الموبايلات من أول آيفون 6s و6s Plus لحد الىيفون الجديد هيدعموا iOS 14